Nakabsan sa kinabuhi ang usa ka 62-anyos nga lalaki human ang iyang gimaneho nga motorsiklo nabanggaan sa usa ka ambulansya sa Sayre Highway, Sitio Mangima, Barangay Dalirig, niadtong Martes sa gabii.
Sa report gikan sa mga otoridad, nahitabo ang trahedya alas 10:15 sa gabii. Nasayran nga samtang nagbiyahe ang biktima paingon sa Sumilao, kalit nga misulod sa iyang linya ang nag-blinker nga ambulansya nga gikan sa kasukwahiang direksyon paingon unta sa Cagayan de Oro City.
Tungod sa kusog nga impact, nakaangkon og seryosong samad ug bun-og sa lawas ang biktima. Daling miresponde ang rescue team ug gidala ang senior citizen sa Bukidnon Provincial Hospital, apan gideklara kining dead on arrival.
Sa pagkakaron, anaa na sa kustodiya sa kapulisan ang drayber sa ambulansya human kini boluntaryong mitugyan sa iyang kaugalingon. Nagpadayon usab ang lawom nga imbestigasyon sa Manolo Fortich Municipal Police Station alang sa pagpahimutang sa saktong kaso.