Gikatakda sa Trial Chamber III sa International Criminal Court (ICC) ang labing unang status conference sa kaso ni kanhi Pangulong Rodrigo Duterte karong Mayo 27, isip kabahin sa pagpadayon sa pagdungog o paghusay.
Sumala sa ICC, gimandoan ang prosekusyon ug ang depensa nga mosumite sa tagsa-tagsa ka mga dokumento ug ebidensiya sa dili pa ang deadline karong Mayo 15.
Lakip niini ang mga trial briefs, disclosure sa mga materyales, ug uban pang importanteng detalye alang sa kaso. Tumong sa maong status conference nga itakda ang timetable o iskedyul sa mismong trial, lakip na ang mga sunod nga lakang sa proseso.
Kahinumduman nga una nang gikumpirma sa Pre-Trial Chamber I ang tulo ka ihap (3 counts) sa crimes against humanity batok kang Duterte, hinungdan nga nideretso na ang kaso sa trial phase.
Niining maong lakang, mas pormal nang sugdan sa ICC ang pagdungog sa kaso sa kanhi pangulo, kinsa kasamtangang anaa sa kustodiya sa The Hague sukad pa niadtong Marso 2025.