Gikabalak-an ang posibleng nga pagsaka sa presyo sa bugas nga gibana-banaang moabot sa P60 hangtod P62 matag kilo karong Septyembre tungod sa pagsaka sa presyo sa abono gikan sa P1,650 ngadto na sa P3,000, sumala kang Agriculture Secretary Francis Tiu Laurel Jr.
Atol sa pagdungog sa Senate PROTECT Committee, gipasabot ni Laurel nga ang pagpabilin sa mga mag-uuma sa tradisyonal nga paggamit sa urea, imbes nga mobalhin sa mga alternatibong abono nga girekomenda sa Department of Agriculture (DA), maoy makapadako sa gasto sa produksyon.
Isip tubag sa maong hagit, gipaningkamutan karon sa DA ang pagpatuman sa mga estratehiya sama sa “rice blend” o pagsagol sa lokal ug imported nga bugas, ug ang “corn blend” nga naggamit og 50-50 nga proporsyon sa mais ug bugas, aron masiguro nga magpabiling barato ug igo ang suplay sa pagkaon sa nasud.