Tingkagol na sa selda sa kapulisan ang usa ka giingong kanhing miyembro sa Militia ng Bayan human kini malampusong nasikop sa Barangay Can-ayan, Malaybalay City, niadtong Abril 29, 2026.
Sa report gikan sa mga otoridad, giila ang dinakpan sa alyas nga “Felix”, minyo ug residente sa lungsod sa Cabanglasan. Nasayran nga alas 10:20 sa buntag dihang gisilbi sa kapulisan ang Warrant of Arrest batok sa suspek alang sa mga kasong arson ug robbery.
Gikatakda ang piyansa nga mobalor og ₱24,000 alang sa kasong arson ug ₱100,000 alang sa kasong robbery alang sa temporaryong kagawasan sa suspek. Matod sa kapulisan, si alyas Felix dugay nang gipangita sa balaod tungod sa iyang kalambigitan sa maong mga krimen kaniadto.
Sa pagkakaron, anaa na sa kustodiya sa mga otoridad ang dinakpan alang sa saktong dokumentasyon ug disposisyon sa korte.