Nagpahigayon og all-senators caucus ang Senate of the Philippines aron hisgutan ang pagpangandam sa posibleng pagsaka sa Articles of Impeachment batok kang Vice President Sara Duterte.
Sumala ni Senate President Vicente “Tito” Sotto III, mahimong kritikal ang timetable tungod kay mag-adjourn ang first regular session sa ika-20 nga Kongreso karong Hunyo.
Gipasabot niini nga kinahanglan anaa sa sesyon ang Senado aron madawat ang Articles of Impeachment gikan sa House of Representatives of the Philippines.
Dugang pa, nga kung makapahigayon og tigum ang Senado isip impeachment court samtang anaa sa sesyon, mahimo kining ipadayon bisan og naka-adjourn na ang regular session, aron dili maputol ang proseso.
Nagpahayag usab ang ubang mga senador sa ilang pagpangandam.
Sumala ni Senate President Pro Tempore Panfilo Lacson, nga magkuha siya og dugang kahibalo sa litigation aron andam isip Senator-Judge.
Samtang si Senator Pia Cayetano mipadayag nga aduna na siyay kasinatian sa impeachment trial, sa pikas bahin si Senador Rodante Marcoleta nagtuo nga dili na kinahanglan og espesyal nga pagpangandam.
Gipasiugda ni Sotto nga ang Senado kinahanglan magpabiling patas ug walay pinili, bisan kinsa pa ang maapektuhan sa impeachment proceedings.
Sa pagkakaron, naghulat pa ang Senado sa desisyon sa House of Representatives of the Philippines, apan giingon nga andam na sila sa dali nga pag-aksyon kung madawat na ang Articles of Impeachment.