Nipahigayon og halapad nga lihok-protesta ang nagkadaiyang progresibong grupo karong adlaw sa Labor Day, Mayo 1, diin hugot gisinggit ang dinaliang umento sa suholan ug seryosong aksyon sa gobyerno taliwala sa krisis sa ekonomiya.
Sa maong mobilisasyon, gipanawagan sa mga mamumuo ang pagpatuman sa P1,200 nga national minimum wage ug ang pagwagtang sa excise tax sa mga batakang palaliton aron mahupayan ang kalisod nga giatubang sa mga trabahante.
Nanawagan usab ang mga raliyesta sa administrasyong Marcos nga hatagan og prayoridad ang pagpanalipod sa katungod sa mga mamumuo ug hunongon ang kontraktwalisasyon aron masiguro ang desente ug lig-on nga panginabuhi alang sa tanan.
Atol sa pagsaulog sa Adlaw sa Labor karong Mayo 1, 2026, gihulagway ni Joshua Mata, ang Secretary General sa SENTR0, nga anaa sa “lawom nga krisis” sa politika ug ekonomiya ang nasud samtang gisaway ang kagamhanan sa giingong kakulang niini sa paghatag og tin-aw nga solusyon sa susamang isyu nga giatubang sa nasud.
Sa pikas bahin, gisaway usab ni Ka Leody de Guzman, ang Chairman Emeritus sa Bukluran ng Manggagawang Pilipino (BMP), ang kagamhanan tungod sa giingong paghatag niini og pabor ngadto sa mga dagkong kapitalista ug mga korporasyon sa lana imbes nga unahon ang interes sa mga ordinaryong mamumuo.