Magpahigayon og special meeting sa sunod semana ang economic team sa administrasyon ni Presidente Ferdinand Marcos Jr. aron hisgutan ang posibleng pagsuspinde sa excise tax sa petrolyo.
Sumala sa Department of Budget and Management (DBM), nga mao usab ang chairman sa inter-agency nga Development Budget Coordination Committee (DBCC), pagahisgutan sa grupo ang tanang aspeto sa posibleng epekto sa panalapi kung ipatuman ang pagsuspinde sa excise tax sa lana, lakip na ang mas lawom nga pag-analisa sa angay nga mga polisiya.
Gipasabot ni Budget Undersecretary Goddes Hope Libiran nga ilang paningkamotan nga mabalanse ang paghatag og dali nga tabang sa katawhan samtang ginabantayan usab ang kalig-on sa pinansyal nga kahimtang sa nasod sa medium term ug ang kinatibuk-ang kalig-on sa ekonomiya.
Kahinumdoman nga niadtong Miyerkules, gipirmahan na ni Presidente Marcos Jr. ang Republic Act 12316 nga nagtugot sa Presidente nga mosuspinde o magpakunhod sa excise tax sa lana base sa rekomendasyon sa DBCC, uban sa pakigtambayayong sa kalihim sa Department of Energy.