Gisuspendi sa National Basketball Association (NBA) si Phoenix Suns forward Dillon Brooks human miabot niya ang iyang ika-16 nga technical foul karong season.
Sumala sa lagda sa NBA, ang usa ka player o coach awtomatikong masuspenso og usa ka duwa nga walay sweldo kung makaabot sa 16 ka technical foul sulod sa regular season.
Sa matag dugang nga duha ka technical foul human niini, magpadayon usab ang suspensiyon.
Sa kaso ni Brooks, nakaabot siya sa 16 ka technical foul sulod lamang sa 49 ka duwa karong season.
Ang pinakabag-o niyang technical foul nahitabo sa duwa batok sa Oklahoma City Thunder, diin napildi ang Suns sa iskor nga 136-109.
Tungod sa suspensiyon, dili makadula si Brooks sa unang duwa sa Suns human sa All-Star break, batok sa San Antonio Spurs.
Si Brooks adunay career average nga 14.8 puntos kada duwa, 3.3 rebounds, ug 0.9 steals. Karong season, misaka ang iyang performance ngadto sa 21.2 puntos kada duwa ug 1.1 steals.