Nagpadayag og dakong kalipay ang pipila ka mga drayber ilabina ang mga nagapamasahero diin ang pagbiyahe ang unang tinubdan sa ilang pang-adlaw-adlaw nga panginahanglan.
Sa pakighinabi sa Bombo Radyo Malaybalay ngadto sa mga drayber sa multicab, gipadayag ni Arnel Motol nga usa ka dakong tabang ang pag-ubos sa presyo sa produkto sa lana gumikan nakahatag kini og kahupayan sa ilang panginabuhian.
Pinasikad sa maong lakang sa mga kompanya sa lana, maminusan ang ilang gasto sa tubil ug madugangan ang ilang kita alang sa ilang pamilya kun itandi sa mga milabay nga mga bulan ug semana.
Subay niini gipaambit usab ni Arnel ang kanunay’ng gasto sa pagbiyahe diin igo-igo na lamang ang mabilin sa iyang kita gumikan halos mahurot sa gasolina apan wala kini mahimo tungod sa kahimtang nga walay kapilian kundili ang mubiyahe aron mamasahero.