Mipagawas og mandato si Department of Agriculture (DA) Secretary Francisco “Kiko” Tiu Laurel Jr., alang sa dinaliang pagbisita sa mga umahan nga apektado sa sunod-sunod nga mga kalamidad.
Gitahasan sa kalihim si Officer-in-Charge Undersecretary for Operations Roger Navarro ug ang hepe sa National Rice Program nga si Undersecretary Chris Morales, nga maoy mangulo sa inspeksyon ug assessment sa mga apektadong umahan.
Gipaniguro sa kalihim nga mahibaw-an dayon ang mga panginahanglanon sa mga mag-uuma nga apektado sa sunod-sunod nga kalamidad aron ang departamento makahimo og tukmang tubag g klakang sama sa pag-apod-apod sa mga agricultural inputs, paghatag og technical assistance, ug uban pa.
Matud ni Laurel, kinahanglang makita sa mga mag-uuma ug mananagat ang presensya sa gobyerno panahon sa kalamidad.
Gipadali usab sa kalihim ang Philippine Crop Insurance Corporation (PCIC) sa pagpahigayon og inspeksyon ug validation sa mga nangaguba nga mga pananom ug pangisdaan aron mapadali ang pagpagawas sa kompensasyon sa mga apektadong mag-uuma ug mangingisda.
Sa pinaka-ulahing report sa departamento, miabot na sa P323.15 milyones ang damyos nga nahiaguman sa sektor sa agrikultura sa nasud tungod sa sunod-sunod nga mga katalagman.
Mihimo ang kalihim sa maong kamandoan samtang naka-leave sulod sa duha ka semana tungod sa medical reasons. Gipaabot usab karong adlawa nga mobalik ang kalihim ug buhaton iyang katungdanan isip kalihim sa Department of Agriculture.