Boluntaryong mitahan sa mga tropa sa 401st Infantry Brigade ubos sa 4th Infantry (Diamond) Division ang upat ka sakop sa Communist Terrorist Group (CTG) sa rehiyon sa Caraga niadtong Mayo 15 ug 16, ning kasamtangang tuig.
Sumala sa report gikan sa Camp Evangelista, nahitabo ang maong pagsurender human napatay sa usa ka engkwentro sa Marihatag, Surigao del Sur niadtong Mayo 11 ang labing taas nga pangulo sa grupo nga si Edilberto Daval alyas “Waco”, ang Commanding Officer sa Regional Operations Command sa NEMRC.
Atol sa maong pagbalik sa sabakan sa balaod, bitbit sa mga rebelde o miyembro sa New People’s Army (NPA) ang duha ka M16 rifles, usa ka AK-47 rifle, usa ka M14 rifle, kauban ang pito ka mga magazine ug kapin sa usa ka gatos ka buhing bala.
Samtang ang laing duha sa mga sumusunod daling mitahan usab sa ilang kaugalingon didto sa San Francisco, Agusan del Sur niadtong Mayo 15, samtang ang laing duha ka kauban ang misunod usab sa pagtahap sa Lianga, Surigao del Sur pagka-ugma, Mayo 16.
Matud ni Col. Glenn Joy U. Aynera ug MGen. Marion T. Angcao, dako kini nga kawad-on sa naluya nga grupo, ug andam ang kagamhanan sa paghatag og bag-ong kinabuhi ug hinabang pinaagi sa Enhanced Comprehensive Local Integration Program (E-CLIP) alang sa mga mibalik na sa sabakan sa gobyerno.