Balhog sa bilangguan ang usa ka 22-anyos nga laborer human masikop sa gikasang buy-bust operation sa mga otoridad sa Purok 1, Barangay Lumbo, Valencia City, Bukidnon, niadtong milabayng adlaw sa gabii.
Ang dinakpan giila sa kapulisan pinaagi sa alyas nga “Kenit,” kinsa bag-ong nalista nga nalambigit sa ilegal nga droga ug residente sa Purok 4, Barangay Poblacion sa maong dapit.
Malampusong gilusad ang maong operasyon pinaagi sa hiniusang pwersa sa Valencia City Police Station, PDEA Bukidnon Team, City Anti-Drugs Special Unit Team (CADSUT) ubos sa buhatan ni Mayor Amie Galario, ug sa koordinasyon sa Provincial Intelligence Unit sa Bukidnon Police Provincial Office.
Atol sa pagrikisa, nakuha gikan sa posisyon sa suspek ang mga sachet sa gituohang shabu nga adunay standard drug price nga ₱34,680.00 ug uban pang mga ebidensya.
Kasamtangan karong gihulat sa dinakpan ang pagpasaka sa tukmang kaso batok niini samtang ang mga nakuhang kontrabando gidala na alang sa eksaminasyon.