Nabungkag ug hingpit nang nawad-an og direksyon ang nahabilin nga mga miyembro sa Communist Terrorist Group (CTG) sa Caraga human napatay ang ilang labing taas nga opisyal. Kini ang gilantaw nga rason sa boluntaryong pagtahan sa upat ka sakop sa maong wlahong grupo ngadto sa mga tropa sa 401st Infantry Brigade ubos sa 4th Infantry Division. Sumala sa maong impormasyon, ang maong pagsurender misunod human napatay sa armadong engkwentro didto sa Marihatag, Surigao del Sur niadtong Mayo 11 si Edilberto Daval alyas Waco, ang Commanding Officer sa Regional Operations Command sa NEMRC.
Bitbit sa mga mibalik sa sabakan sa gobyerno ang tag-as nga kalibre sa armas nga gilangkuban sa usa ka AK47 rifle, usa ka R4 rifle, usa ka rifle grenade, usa ka scope, ug mga magazine nga adunay mga buhing bala. Giingong dungan nga mitahan ang mga rebelde sa managlahing operasyon sa Surigao del Sur ug Agusan del Norte niadtong Mayo 15 ug 16.
Gipahayag ni 401st Brigade Acting Commander Col. Glenn Joy Aynera nga ang pagkamatay sa ilang lider maoy hinungdan nga nabungkag ang baruganan sa nahabilin nga mga miyembro, nga nag-aghat kanila sa pagbiya sa armadong kalihukan. Sa pagkakaron, ang maong mga kanhi rebelde giproseso na alang sa pagdawat og mga hinabang ug saktong disposisyon sa kagamhanan.