Dili mosurender ug padayong gukdon ang mga pangandoy bisan pa man sa kakapoy ug mga kapakyasan. Kini ang madasigong mensahe sa usa ka tubong-Bukidnon nga topnotcher sa Licensure Examination for Professional Teachers o LEPT. Sa pakighinabi sa Bombo Radyo Malaybalay ngadto kang Sofia Acquin A. Parista, Rank 5 sa LEPT gikan sa Bukidnon State University, giangkon niini nga nakaagi usab siya sa grabeng kakapoy apan nagpabiling lig-on tungod sa sakripisyo sa iyang mga ginikanan.
Gipaambit ni Parista nga gawas sa pagsunod sa pipila ka mga pampaswerte sama sa pagsul-ob og pula nga underwear ug pagpatahod og lapis sa mga topnotcher, dako og natabang ang iyang husto nga study technique. Imbes nga mag-memorize, nag-focus siya sa pagtubag sa mga actual board exam questions aron daling mahibal-an ang iyang mga kahuyang sa matag subject.
Iyang gipahinumdoman ang mga umaabot nga examinees ug mga retakers nga likayan ang cramming ug tarongon ang pagdumala sa oras. Sa pagkakaron, ang maong kalamposan sa topnotcher nagsilbing inspirasyon sa tibuok probinsya alang sa padayong pagkab-ot sa pangandoy sa unahan.