Nagpangandam na ang Commission on Elections (Comelec) Region 10 alang sa umaabot nga pag-abli sa rehistrasyon sa mga botante isip pagpangandam sa 2028 National and Local Elections.
Sa pakighinabi sa Bombo Radyo Malaybalay ngadto sa Comelec Region 10 Director, gibutyag niini nga gitakdang sugdan sa Nobyembre ning tuiga hangtod Hulyo 30 sa sunod tuig ang voter registration, base sa tentative schedule sa ahensya.
Gipasabot usab sa opisyal nga dili lamang bag-ong mga botante ang mahimong makapahimulos sa serbisyo, hinunoa apil ang pagkorihir sa mga detalye sa rehistro ug pag-update sa civil status.
Apan walay ipahigayong rehistrasyon matag Lunes tungod sa work-from-home arrangement sa mga empleyado sa Comelec, isip kabahin sa lakang sa kagamhanan sa pagpakunhod sa gasto sa operasyon.
Samtang gitarget sa Comelec Region 10 nga makadugang og labing menos lima ka porsyento sa ihap sa mga rehistradong botante sa rehiyon, gikan sa kasamtangang 3.2 milyones.