Nasikop sa gikasang drug buy-bust operation ang usa ka bag-ong nailhang drug personality human nakuhaan og gidudahang shabu sa Purok 2, Barangay Central Poblacion, Kalilangan, niadtong Abril 11, 2026, alas 11:34 sa gabii.
Base sa report gikan sa Bukidnon Police Provincial Office (BPPO), ang dinakpan giila lamang sa tago nga ngalan nga si Alyas “Saidi”, 31-anyos. Ang operasyon gipahigayon sa mga operatiba sa Kalilangan Municipal Police Station ubos sa pagpanguna ni PCPT Teresita L. Manejero, kauban ang 2nd Bukidnon PMFC, 1004th Maneuver Company sa RMFB-10, ug ang Philippine Drug Enforcement Agency (PDEA), sa koordinasyon sa Provincial Intelligence Unit.
Narekober gikan sa posisyon sa suspek ang lima ka sachet sa gituohang shabu nga duna’y gibug-aton nga 2 gramos ug gibanabanang duna’y standard drug price nga ₱13,600. Lakip sa mga nasakmit nga ebidensya mao ang usa ka floral wallet ug ang marked money nga gigamit sa operasyon.
Sa pagkakaron, ang suspetsado anaa na sa kustodiya sa Kalilangan MPS alang sa saktong dokumentasyon samtang gihan-ay na ang kasong paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002. Ang mga nakumpiskang ilegal nga droga gidala na usab sa Provincial Forensic Unit alang sa laboratory examination.