Masaligon si Atty. Kristina Conti, assistant to counsel sa International Criminal Court (ICC), nga dili mabalit-ad sa ICC Appeals Chamber ang desisyon nga nag-isip kang kanhi Presidente Rodrigo Duterte nga “fit” o takus nga motambong sa iyang Confirmation of Charges hearing nga magsugod karong Pebrero 23, 2026.
Matud ni Conti, bisan pa man og duna’y gagmay nga mga isyu, wala na’y dako nga babag aron ipadayon ang mga pagdungog, ilabi na sa bahin sa logistics ug protocol.
Kahinumduman nga ang kampo ni Duterte niapela pag-usab sa desisyon sa ICC Pre-Trial Chamber I, diin giingon nila nga duna’y “error of law” tungod kay wala matud pa tagda ang gisumite nga medical report gikan sa usa ka neurologist ug neuropsychologist.
Apan alang kang Conti, dili makatabang sa kampo ni Duterte ang sigig paglangan sa pagdungog, ilabi na kon basehan ang giingon nga nagkagrabe nga kahimsog sa panglawas sa kanhi presidente. Dugang pa niya, dili siya motuo nga ingon niana kagrabe ang kondisyon ni Duterte sama sa gihulagway sa iyang depensa.
Gibutyag sa Pre-Trial Chamber I, base sa pagsusi sa mga expert panel, nga si Duterte duna’y igong “cognitive condition” aron makaapil sa mga pre-trial proceedings. Gidugang usab sa chamber nga aron mahimong patas, dili sila magdepende lamang sa medical reports nga gisumite sa bisan kinsa nga partido o sa interpretasyon sa defense team.