Masaligon si Manila 6th district Representative Bienvenido Abante Jr. nga makakuha og “more than enough” kon kapin pa sa one-third sa gikinahanglang boto gikan sa mga myembro sa House of Representatives aron ma-impeach si bise-Presidente Sara Duterte.
Kini kung himuong basehanan ang nahimong resulta kaniantong pagbotar sa unang impeachment ni bise-Presidente.
Sa usa ka interbyu karong adlaw nga Sabado, Pebrero 21, 2026, gipasabot ni Abante nga gikan sa 311 nga kongresista, 105 nga pabor nga boto lamang ang kinahanglan nga makatupong sa one-third aron mapasar ang impeachment complaint sa Senado.
Wala usab ikalimod sa mambabalaod nga aduna kini gikabalak-an nga posibleng maglisod pagkuha og igong boto kung mapasar sa Senado ang articles of impeachment batok sa Bise Presidente.
Matud ni Abante, 16 ka affirmative votes gikan sa mga Senador ang gikinahanglan aron maconvict ang Bise Presidente.
Nanghinaot ang mambabalaod nga dili kini usa ka “political ploy”, kondili ang mga Senador magbase sa desisyon sa ebidensya ug unod sa impeachment complaint.
Samtang, gipasiugda usab ni Abante ang pagsunod sa House of Representatives sa hukom sa Korte Suprema sa pagdumala sa mga impeachment complaints batok kang Bise Presidente Sara Duterte.
Sigon niini nga base sa House Committee on Justice, aduna pay 10 ka session days, nga ibutang sa Order of Business human ma-endorso o ma-transmit ang mga impeachment complaints ngadto sa opisina sa House Speaker.
Matud ni Rep. Abante, posibleng muabot og duha ngadto sa tulo ka adlaw ang deliberasyon sa House Committee on Justice sa impeachment complaints batok sa Bise Presidente adisir hingpit nga madala sa plenaryo diin gikinahanglan ang one-third vote gikan sa House members aron ma-impeach ang ikaduhang labing taas nga opisyal sa nasud.
Kahinumdoman nga usa si Abante sa mi-endorso sa ikaupat nga impeachment complaint batok sa Bise Presidente, nga gikompirma ni House Secretary General Cheloy Garafil kaniadtong Huwebes, Pebrero 19, 2026 nga nadawat sa buhatan ni House Speaker Bojie Dy.