Mikabat na sa 204 ang gidaghanon sa mga namatay tungod sa dakong kadaut nga gibilin sa Bagyong Tino sa Pilipinas, ilabina sa Visayas ug pipila ka bahin sa Mindanao, base sa pinakabag-ong datos sa National Disaster Risk Reduction and Management Council (NDRRMC) niining Sabado, Nobyembre 8.
Sa maong ihap, 141 ang namatay sa Cebu, 27 sa Negros Occidental, 20 sa Negros Oriental, 6 sa Agusan del Sur, 3 sa Capiz, 2 sa Southern Leyte, ug tig-usa sa Antique, Iloilo, Guimaras, Bohol, ug Leyte.
Gikumpirma usab sa NDRRMC nga 109 pa ang gi-report nga nawagtang, samtang 156 katao ang samdan sa Cebu, Leyte, Negros Occidental, Surigao del Norte ug Surigao del Sur.
Sa kinatibuk-an sa nasud, mikabat sa 820,000 ka pamilya o 2.9 milyon ka indibidwal ang naapektuhan sa kapin 6,000 ka barangay sa walo ka rehiyon.
Base sa damage assessment, daghang kalsada ug tulay ang nadaot, pipila ka syudad ug munisipyo ang nawagtangan og kuryente, tubig, ug komunikasyon.
Sa agrikultura, mikabat sa ₱40.7 milyon ang kadaut samtang sa imprastruktura, natala ang ₱17.25 milyon nga damyos. Sa pagtubag sa krisis, nakahatag na ang gobyerno og ₱198 milyon nga ayuda alang sa mga pamilya nga grabeng naapektuhan sa Bagyong Tino.