Nasakmit sa kapulisan ang gibanabanang P596,000 nga kantidad sa ginasuspetsahang puslit nga sigarilyo atol sa checkpoint operation sa Barangay Samburon, Linamon, Lanao del Norte niadtong milabay’ng adlaw.
Nasikop usab ang 33-anyos nga drayber nga giila sa alyas “Aladin” human naharang ang usa ka maroon nga Toyota SUV nga gikargahan og 250 ka ream sa Green Cannon Menthol ug 495 ka ream sa Red Modern nga sigarilyo.
Gikatahong nagikan sa Munai ang mga sigarilyo ug gikatkdang dad-on matud pa sa Iligan City aron ibaligya atol sa Diyandi Festival.
Busa gikuptan sa kapulisan ang mga nakumpiskang sigarilyo ug sakyanan samtang hulaton ang pag-turnover niini sa Bureau of Customs alang sa hustong aksyon.
Gidala na karon sa Linamon Municipal Police Station ang nadakpan alang sa dokumentasyon ug hustong disposisyon.