Gihagit ni Senate Minority Leader Alan Peter Cayetano si Sen. Panfilo “Ping” Lacson nga susihon usab sa parehas nga giladmon ang mga flood control projects sa ubang distrito sa nasud aron malikayan ang alegasyon sa “selective justice.”
Matud ni Cayetano, mahimong mopili si Lacson og duha o tulo ka lugar gawas sa Taguig ug Davao ug ipailalom kini sa parehas nga pagsusi.
Giinsistir ni Cayetano nga daghang distrito sa nasud ang adunay flood control projects ug dili lamang ang mga lugar nga konektado sa pipila ka personalidad ang angay tutokan sa imbestigasyon.
Gipanalipdan usab ni Cayetano ang flood control efforts sa Taguig, diin matud niya dako na ang pagkunhod sa mga lugar nga kanunayng gibahaan kaniadto.
Apan giila usab niya nga adunay pipila ka lugar nga nakasinati gihapon og flash floods.
Samtang, sigon ni Lacson nga nakapasa na siya ug ang iyang team sa Office of the Ombudsman og dili moubos sa 45 ka case studies nga adunay kauban nga official documents, may kalabotan sa giingong systemic anomalies sa flood control projects sa Taguig.
Gikumpirma usab sa Ombudsman ang ilang fact-finding investigation bahin sa mga alegasyon.
Matud ni Cayetano, kinahanglan magpokus ang mga opisyal sa pagsulbad sa problema ug dili sa pagpalala niini tungod sa partisan disputes.