Balhog sa bilanggoan ang pito (7) ka indibidwal human sa nagkadaiyang operasyon sa kapulisan sa Bukidnon niadtong milabay’ng adlaw.
Lakip ang usa ka Top 6 Most Wanted Person sa provincial level nga nag-atubang og mga kaso nga sexual assault, acts of lasciviousness ug less serious physical injury, ug unom ka ginasuspetsahang nalambigit sa ilegal nga droga.
Sa Tupi, South Cotabato, nadakpan si Sanny Boy Magno Asturias, 58 anyos ug residente sa Valencia City, Bukidnon, pinaagi sa warrant of arrest nga may mga kaso nga less serious physical injury, acts of lasciviousness ug sexual assault.
Mokabat sa P258,000 ang girekomendar nga piyansa alang sa mga kaso. Samtang, unom ka ginasuspetsahang nalambigit sa droga ang nadakpan sa buy-bust operations sa Kalilangan, Don Carlos, Malaybalay City, Lantapan ug Valencia City. Pinakadaghan ang nakumpiskang giingong shabu sa Valencia City nga mokabat og 6.4 gramos, nga gibana-banaang balor nga P43,520, gikan kang alyas Tata, 48 anyos.
Sa Kalilangan, duha ang nadakpan ug 5.97 gramos nga giingong shabu ang nakumpiska nga nagkantidad og P40,596. Sa Malaybalay City, nasakmit usab 4.074 gramos; sa Lantapan, 1.8 gramos; samtang 0.30 gramos sa Don Carlos.
Sa pagkakaron, giandam na ang mga kaso alang sa pagpasaka sa korte ubos sa Republic Act 9165, samtang ang tanang nadakpan anaa na sa kustodiya sa mga kapulisan alang sa dokumentasyon ug hustong disposisyon.