Nagtuon ug nagplano karon ang Philippine Sports Commission (PSC) sa pagpahimutang og mga regional training center alang sa tennis sa nagkadaiyang bahin sa nasud aron matabangan ug mabansay ang mga batan-ong atletang Pilipino.
Sa taho nga nakalap sa Bombo Radyo, gibutyag ni Biliran Representative Gerardo Espina Jr., ang budget sponsor sa PSC sa Kongreso, nga gituyo ang maong proyekto aron mapalapdan ang suporta sa ubang dula gawas sa basketball ug makadeskubre og mga atletang makatubag sa kalampusan sa tennis sensation nga si Alex Eala.
Dugang pa, gitumong sa PSC nga hatagan og dugang pagtagad ug pasilidad ang mga medal-rich sports sama sa tennis, boxing, ug golf diin dako ang potensyal sa mga Pilipino nga makahatag og dungog sa mga internasyonal nga kompetisyon.