Patay ang usa ka 33-anyos nga lalaki human gipusil og makatulo ka higayon sa wala mailhing suspek samtang naglakaw pauli sa iyang puy-anan diha sa Purok 4, Sitio Pantaron, Barangay Banlag, Dakbayan sa Valencia, Bukidnon.
Naglakaw matod pa ang biktima samtang nag-gamit sa iyang cellphone sa dihang giduol kini sa suspek ug gipusil. Nakaangkon ang biktima og mga samad-pinusilan sa tuong dughan, wala nga tiyan, ug tuong paa nga maoy nag-ingon sa iyang hinanaling kamatayon.
Subay sa gihimong pakisusi sa mga sakop sa Valencia City Police Station, giila ang usa ka person of interest nga adunay alyas nga “Asutay”. Nasayran nga si Asutay mao ang kanhi karelasyon sa 26-anyos nga babaye nga kasamtangang karelasyon na sa biktima, diin gilantaw karon sa kapolisan ang anggulo sa selos ug panagbingkil sa relasyon isip posibleng motibo sa maong pagpamusil.