Gikumpirma sa National Privacy Commission (NPC) niadtong Martes, Nobyembre 10, nga nakadawat sila og personal data breach notifications gikan sa napulo ka ahensya sa gobyerno, usa ka insidente nga nagpataas sa kabalaka sa seguridad sa datos sa nasud.
Lakip sa mga ahensya nga nakasinati og data breach mao ang Department of Information and Communications Technology (DICT), Department of Labor and Employment (DOLE) pinaagi sa Bureau of Local Employment niini, Bureau of Internal Revenue (BIR), ug Philippine Amusement and Gaming Corporation (PAGCOR).
Naapektuhan usab ang Department of Justice (DOJ) pinaagi sa Office for Alternative Dispute Resolution niini, Securities and Exchange Commission (SEC), Department of Trade and Industry (DTI), Department of Science and Technology – Philippine Institute of Volcanology and Seismology (DOST-PHIVOLCS), Presidential Commission on Good Government (PCGG), ug ang Philippine Coast Guard (PCG).
Subay niini, gisugdan na sa NPC ang imbestigasyon sa maong pagtagas sa mga personal nga datos gikan sa mga ahensya nga nalambigit.
Matud ni NPC Deputy Privacy Commissioner ug Spokesperson Atty. Jose S. Belarmino II, “Each notification received by the NPC is reviewed and assessed by our Compliance and Monitoring Division, which examines the nature and circumstances of the reported incident, its potential impact on affected individuals, and the measures undertaken by the agency concerned.”
Dugang pa ni Belarmino, bisan pa sa katungdanan sa komisyon sa pagpanalipod sa sensitibong datos, responsibilidad gihapon sa mga ahensya sa gobyerno ang pagsiguro sa proteksyon sa ilang datos aron masiguro ang kaluwasan ug malikayan ang bisan unsang matang sa pagpahimulos sa mga apektadong indibidwal.
Giinsistir usab sa NPC ang pananagutan sa mga ahensya, isip personal information controllers, sa kaluwasan sa mga personal nga datos ubos niini, outsourced man kini o subcontracted gikan sa third-party service providers.
Obligasyon usab nila ang pagpatuman sa angay nga organizational, physical, ug technical security measures aron maprotektahan ang personal nga datos.
Samtang, gipahinumduman sa komisyon ang publiko nga magpabilin nga alerto batok sa mga phising attempt, scam, identity theft, ug uban pang matang sa social engineering nga mahimong moresulta sa pagpahimulos gikan sa gitaho nga mga data breaches.
Gipahimangnoan usab ang tanan batok sa pagtubag sa kadudahan nga mga mensahe, pag-klik sa dili pamilyar nga website links, pag-download sa mga attachments, ug pagpakigbahin sa personal ug sensitibong impormasyon.
Nangako usab ang NPC nga padayon nilang gibantayan ang mga taho sa data breach ug ang pagtuman sa ilang katungdanan subay sa Republic Act No. 10173 o ang Data Privacy Act of 2012.