Nakapukaw sa atensyon sa mga residente sa Bukidnon ang talagsaong kahayag sa kalangitan nga gitawag og “space jellyfish,” nga posibleng nalambigit sa paglansad sa rocket gikan sa China.
Matud sa Philippine Space Agency (PhilSA), ang maong panghitabo mahitabo kon ang aso o exhaust plume sa rocket nga anaa sa taas kaayong bahin sa atmospera maigo sa kahayag sa adlaw, samtang ngitngit na sa ubos nga bahin sa kalibotan.
Tungod niini, moporma ang kahayag nga morag payong o lawas sa usa ka jellyfish nga makita bisan gikan sa layo.
Dili kini langyaw nga sakyanan o UFO, kondili natural nga epekto sa kahayag sa rocket plume. Sa miaging paglansad sa China nga Long March 12 niadtong Nobyembre 9, namatikdan usab ang susamang panghitabo sa Palawan ug West Philippine Sea.