Gipahibalo sa Iran nga ilang gipahunong una ang ilang mga pagpangatake batok sa mga kaalyado sa Estados Unidos sa Middle East, human usab gipahunong sa U.S. ang ilang mga airstrike sulod sa duha ka sunod-sunod nga gabi-i.
Sumala sa spokesperson sa Iranian Army nga si Mohammad Akraminia, ang ilang mga operasyon naggikan ra isip ganti sa mga pag-atake sa U.S. Busa, sa dihang nagpahulay ang U.S. sa pagpamomba, mipahuway usab ang Iran sa ilang retaliatory operations.
Ang maong nakita nga paghunong sa U.S. naggikan taliwala sa mga taho nga nagakahubas na ang supply sa ilang defensive missiles ug munisyon, ingon man ang kabalaka ni U.S. President Donald Trump sa mas dakong epekto sa gubat sa kalibotanong ekonomiya.
Bisan pa man og gibalibaran una ni President Trump ang girekomendar nga subling pagpabuto aron hatagag higayon ang posibles nga pagbalik sa negosasyon ug diplomasya, nagpasidaan gihapon kini nga magpahigayon sila og “mas bug-at nga lebel” sa pagpangatake kon dili magpaka-seryoso ang Iran sa pakigdait.