Tulo ka lalaking gitudlong Street Level Individuals (SLI) sa ilegal nga drugas ang nadakpan sa gipahigayon nga buy-bust operation sa kapolisan diha sa lungsod sa Kitaotao, Bukidnon.
Sa taho nga nadawat sa Bombo Radyo gikan sa Bukidnon Police Provincial Office sa pamunoan ni Provincial Director PCOL Oliver Sotto Navales, gipahigayon ang operasyon sa mga sakop sa Kitaotao Municipal Police Station diha sa Purok 4, Barangay Tawas sa maong lungsod. Nakuha gikan sa mga suspetsado ang walo ka sachet sa gitoohang shabu nga nagtimbang og 3.86 ka gramo ug nagkantidad og ₱26,248.
Gawas sa mga gidili nga drugas, nasakmit usab gikan sa tulo ka nadakpan ang pipila ka kagamitan sa pag-singhot sa shabu, tulo ka cellphone, ug ang ₱500 nga buy-bust money. Sa kasamtangan, ang mga suspetsado pabilin nga gihuptan sa selda sa Kitaotao MPS samtang ginaandam na ang pormal nga kaso batok kanila kalabot sa paglapas sa Republic Act 9165.