Japan, nakaabot sa record-high nga 107,677 ka centenarians

Mikabat sa record-high nga 107,677 ang mga Japanese nga nag-edad og 100 anyos pataas karong tuiga, sumala sa Ministry of Health, Labour and Welfare.

Kini na ang ika-56 nga sunod-sunod nga tuig nga misaka ang ihap sa mga centenarian, diin hapit 88 porsyento kanila mga kababayen-an.

Apan kauban sa pagsaka sa ihap sa mga tigulang ang nagkagrabeng problema sa demograpiya sa Japan tungod sa nagkagamay nga birth rate.

Hapit tulo sa matag 10 ka residente ang nag-edad og 65 anyos pataas, ug gibanabana nga mahimong moabot sa 40 porsyento ang maong bahin sa populasyon pag-abot sa 2070.

Gipasidaan nga magpabilin kining hagit sa ekonomiya tungod sa kakulang sa mga trabahante nga mosuporta sa pension, healthcare ug uban pang social services.