Gipadayag si Vice President Sara Duterte nga iya nang gitugyan sa iyang legal team ang tanang pagpangandam alang sa umaabot nga impeachment trial sa Senado nga magsilbing impeachment court.
Matud sa Bise Presidente, bisan pa nga abogado siya ug adunay kaugalingong panan-aw sa iyang kaso, mas giuna niya ang desisyon sa iyang mga abogado aron mas organisado ug epektibo ang ilang depensa.
Sumala usab ni Duterte, nga gipakunhod niini ang gidaghanon sa iyang defense team aron mas sayon ang koordinasyon ug pagplano sa estratehiya sa kaso.
Gipunting niini nga mosunod lamang siya sa tanang lakang nga itakda sa iyang legal team nga ilang giisip nga pinakamaayo para sa iyang depensa.
Sa laing bahin, gipadayag usab ni VP Sara nga ang kasamtangang kagubot sa liderato sa Senado usa ka repleksyon sa kakulang sa klarong direksyon sa liderato sa gobyerno.
Matud ni Duterte, dili lamang sa Senado makita ang kalibog kondili sa tibuok sistema sa administrasyon.
Sa isyu sa nagkabahin nga kampo sa Senado, sigon sa Bise Presidente nga wala siya mipabor sa bisan kinsa sa duha ka grupo.
Nanawagan siya nga maghiusa ang mga senador ug tutukan ang ilang mandato sumala sa Saligang Batas.