Nakaangkon og hamstring injury sa iyang tuong paa ang Filipino-American rookie nga si Dylan Harper sa San Antonio Spurs atol sa Game 2 sa Western Conference Finals batok sa Oklahoma City Thunder.
Nahitabo ang insidente sa third quarter human matod pa matumba si Harper sa iyang pag-landing gikan sa usa ka driving layup batok ni Shai Gilgeous-Alexander. Bisan og misulay pa siya sa paglakad pabalik sa bench, daling giagak si Harper sa medical staff sa Spurs padulong sa locker room aron masusi ang iyang kahimtang.
Sa wala pa ang injury, nakatala si Harper og 12 puntos, 3 ka assists, ug 2 ka rebounds sulod sa 25 minutos nga pagduwa. Bag-o lang usab siya napili nga mapabilang sa prestihiyosong NBA All-Rookie First Team tungod sa iyang nindot nga gipakitang abilidad karon nga season.