Patay ang usa ka 53-anyos nga lalaki human pusila sa wala mailhing suspetsado kagahapong adlawa, sa Purok 15, Barangay Bagontaas, Valencia City.
Matod pas operatiba maabtan sa mga miresponding pulis ang biktima, nga residente sa Barangay Lumbo, nga wala na’y kinabuhi ug naligo sa kaugalingong dugo human makaangkon og samad pinusilan sa wala nga bahin sa iyang ulo.
Subay sa inisyal nga imbestigasyon, padulong unta ang biktima sa fish landing area sakay sa iyang motorsiklo nga adunay sidecar sa dihang kalit kining giatangan ug gipusil sa suspek. Human sa krimen, daling misutoy palayo ang suspetsado sakay sa usa ka motorsiklo paingon sa habagatang direksyon.
Tungod sa maong panghitabo, gipaubos na sa full alert status ang tanang police units sa dapit dungan sa paglusad og hot pursuit operation aron madakpan ang responsable. Nagpadayon usab ang SOCO team sa pagproseso sa dapit nga nahitabuan aron makaplagan ang mga dugang ebidensya nga makatabang sa paspas nga kasulbaran sa kaso.