Luwas ug wala maunsa si US President Donald Trump human sa usa ka tensyonado nga insidente sa pagpamusil nga nahitabo atol sa tinuig nga White House Correspondents’ Dinner sa Washington Hilton Hotel niadtong Sabado sa gabii.
Sumala sa mga taho, kalit nga naundang ang panihapon sa dihang nadungog ang sunod-sunod nga buto sa armas. Ang mga sakop sa Secret Service daling nilihok aron panalipdan ang Presidente ug ang Unang Ginang nga si Melania Trump, ug dinalian silang gipagawas sa ballroom alang sa ilang seguridad.
Ang ubang mga bisita, nga naglakip sa mga inilang peryodista ug mga opisyal sa gobyerno, daling nanago sa ilawom sa mga lamesa samtang nagpadayon ang kagubot.
Giila sa mga awtoridad ang suspek nga si Cole Tomas Allen, 31-anyos, gikan sa Torrance, California. Nasayran nga armado kini og shotgun, handgun, ug mga kutsilyo sa dihang misulay kini sa pagsulod sa dapit diin gihimo ang okasyon. Nadakpan dayon sa Secret Service ang suspek ug anaa na karon sa kustodiya sa kapolisan.
Sa iyang pamahayag sa social media, gidayeg ni Trump ang kaisog ug dinalian nga aksyon sa Secret Service ug uban pang law enforcement agencies. “Nindot ang trabaho sa Secret Service ug Law Enforcement. Paspas ug isog silang nilihok,” matod pa ni Trump.
Usa ka sakop sa Secret Service ang naigo sa bala apan luwas kini tungod sa iyang bullet-proof vest. Wala’y laing naangol sa maong insidente.
Tungod sa hitabo, gi-cancel ang nahabiling bahin sa programa apan gipasalig sa White House Correspondents’ Association nga i-reschedule ra ang maong panagtigom. Nagpadayon pa ang lawom nga imbestigasyon sa FBI ug uban pang ahensya aron masuta ang motibo sa suspek sa maong pag-atake.