Giila karon ang Vacheron Constantin Berkley Grand Complication isip pinakakumplikadong relo nga nahimo sukad sa kasaysayan, tungod sa 63 ka individual complications o mga espesyal nga mekanismo nga anaa niini.
Dili lamang kini yano nga relo nga nagpakita sa oras, minuto ug segundo, kondili naglangkob og daghang komplikadong features sama sa Hebraic Perpetual Calendar, moon phases, Hebrew year, alarm functions, chronograph ug uban pang espesyal nga mekanismo.
Ang proyekto nagsugod sa Reference 57260 niadtong 2015, usa ka pocket watch nga gihimo alang sa usa ka pribadong collector.
Kini nahimong basehan sa paghimo sa mas komplikado nga Berkley Grand Complication.
Mas nakapahibulong pa niini mao nga napasulod ang 63 ka complications sa usa lamang ka gamay nga relo, nga gihimo gamit ang 2,870 ka gagmay nga mekanikal nga piyesa.
Ang two-sided pocket watch gihimo gikan sa 18-karat white gold, adunay gidak-on nga mga duha ka pulgada ug motimbang og 960 gramos.
Milabaw kini sa kanhi record holder nga Patek Philippe Calibre 89, nga adunay 33 lamang ka complications.
Bisan pa nga wala gipahibalo ang eksaktong presyo niini, gibanabana sa mga eksperto nga mokabat sa kapin 10 milyon ka dolyar ang kantidad sa usa ka piraso lamang niini nga talagsaong obra maestra sa watchmaking.