Gipahibalo sa US Central Command kon CENTCOM kaniadtong Sabado nga naghimo kini og 10 ka serye sa mga pag-atake batok sa kapin sa 30 ka mga target sa grupong Islamic State kon ISIS sa Syria.
Sumala sa taho sa militar, ang maong mga operasyon gihimo kaniadtong Pebrero 3 hangtod Pebrero 12.
Sumala sa CENTCOM, partikular nga gitarget sa Estados Unidos ang imprastraktura ug mga pasilidad diin asa gihipos ang mga armas sa ISIS aron pahuyangon ang kapasidad sa maong teroristang grupo.
Tumong matud pa sa maong mga serye sa mga pag-atake nga mapalungtad ang seguridad sa rehiyon ug mapugngan ang pagpakusog sa mga pwersa sa Islamic State.
Gibombahan sa mga pwersa sa Amerika ang kritikal nga imprastraktura sa ISIS, lakip ang mga kampo, mga command center, ug mga pasilidad alang sa pagtipig sa mga high-powered nga armas.
Wala na gitino ang eksaktong mga lungsod, apan ang operasyon nagtutok sa nahibal-an nga mga kuta sa mga nahabilin nga Islamic State sa sulod sa teritoryo sa Syria.
Sumala sa taho, wala’y gikatahong US military nga naangol o namatay atol sa 10 ka adlaw nga operasyon.
Taliwala sa pagkapildi sa ISIS sa “caliphate” niini sa tuig 2019, nagpabilin ang hulga sa “sleeper cells” niini sa Iraq ug Syria, nga padayon nga gibantayan sa US ug sa mga kaalyadong pwersa niini.