Naangol ang upat ka tawo human gisunog sa usa ka 32-anyos nga lalaki ang ilang panimalay sa P-9A, San Miguel, Maramag, Bukidnon pasado alas 5 sa hapon sa Marso 22, 2026, human sa panagbangi sa iyang live-in partner.
Base sa inisyal nga imbestigasyon, nahitabo ang insidente human sa usa ka mainitong panaglalis tali sa suspetsado ug sa iyang live-in partner. Samtang pauli ang mag-uyab, nagka-away sila hangtod nga pag-abot sa balay, kalit nga gibubuan sa lalaki og gasolina ang ilang panimalay ug giduslitan ug kalayo.
Nakurat ang iyang live-in partner lakip na ang uban pang nakapuyo sa maong balay, diin apil ang usa ka 24-anyos nga babaye ug duha ka mga menor de edad. Tungod sa maong sunog, nakaangkon og mga samad paso ang suspetsado, lakip ang iyang partner, ug ang uban pang mga biktima.
Dali nga miresponde ang mga personnel sa MDRRMO Maramag ug gidala ang mga biktima ngadto sa balay tambalanan alang sa dinaliang medikal nga atensyon.
Sa pikas bahin, daling nakontrola sa mga personnel sa BFP Maramag ang kalayo aron dili na mokatap pa. Kasamtangan na karong giimbestigahan sa kapulisan ang maong insidente alang sa posibleng pagpasaka og kasong Arson batok sa maong lalaki.