Gipahamtangan og sentensyang kamatayon sa nasod sa China ang upat pa ka mga miyembro sa iladong “Bai mafia family” gikan sa Myanmar. Sumala sa mga report, kini nga pamilya giila nga usa sa labing banggiitang grupo nga nagpadagan og mga scam centers didto sa Myanmar nga nakabiktima og daghang tawo.
Ang maong upat ka indibidwal apil sa 21 ka mga miyembro ug kaubanan sa maong sindikato nga gisentensyahan og kamatayon sa korte sa Guangdong province tungod sa mga kasong fraud (pagpanlimbong), homicide, pagpanakit, ug uban pang seryosong krimen. Kahinumduman nga niadtong Nobyembre 2025, gisentensyahan na ang lima ka miyembro lakip ang lider sa clan nga si Bai Suocheng, kinsa namatay ra usab tungod sa sakit human mahatulan.
Kini nga lakang kabahin sa mas gipahugtan nga operasyon sa China batok sa mga illegal scam operations sa South East Asia nga nakabiktima og linibo ka mga lungsuranong Intsik. Sa miaging semana lamang, 11 usab ka miyembro sa “Ming family mafia” ang gipahamtangan og parehas nga sentensya sa maong nasod isip bahin sa ilang crackdown batok sa kriminalidad.