Gidemanda sa sektor sa transportasyon sa Amihanang Mindanao ang ₱2.00 nga sakay sa pletehan samtang gipangayo usab ang pagpahunong sa gipanglantawang pagsulod sa 300 ka yunit sa Green Taxi sa Dakbayan sa Cagayan de Oro.
Sa pakighinabi sa Bombo Radyo kang Joel Gabatan, Regional Coordinator sa National Confederation Transportation Unit (NCTU), gibutyag niini nga nagkahiusa ang mga pederasyon sa Region 10 nga ipasaka ngadto sa ₱15.00 ang minimum nga pletehan sa jeep. Gidemanda usab sa grupo ang pagbasura sa 12% excise tax sa lana, pagtangtang sa Oil Deregulation Law, ug ang pagpabalik sa fuel subsidy sa gobyerno batok sa sige’g saka nga presyo sa petrolyo.
Dugang pa ni Gabatan, giinsistir sa ilang grupo nga dili angay magpagawas og bag-ong prangkisa ang LTFRB alang sa mga Green Taxi kon walay pormal nga rekomendasyon o ordinansa gikan sa lokal nga panggamhanan sa CDO kay makadugang ra kini sa kahuot sa dalan. Pahimangno sa lider sa transportasyon, nag-andam na sila alang sa pormal nga tigum kauban ang mga pederasyon ug kooperatiba aron sabutan ang adlaw sa gipanglantawang transport strike kon dili gihapon aksyonan sa gobyerno ang ilang mga petisyon.