Dili na isumiter alang sa pagboto o paghukom sa Senado ang Articles 1, 3 ug 4 sa impeachment complaint batok kang Vice President Sara Duterte, subay sa desisyon sa Senate Impeachment Court nga gipangulohan ni Sen. Francis “Chiz” Escudero.
Giklaro ni Escudero nga lahi ang epekto sa pag-atras sa mga kaso ubos sa Articles 1 ug 4, nga nahuman na ang presentasyon sa ebidensiya sa prosecution, kumpara sa Article 3 nga giatras sa wala pa makapresentar og ebidensiya ang prosecution.
Matud ni Escudero, dili na mahimong ibalik ang Article 3 sulod sa kasamtangang impeachment trial hangtod mahuman kini. Ang tulo ka artikulo dili na usab mahimong basihan sa paghukom kon sad-an ba o dili sad-an si Duterte niini.
Gitugotan usab sa korte ang prosecution, kampo ni Duterte ug ilang mga saksi nga motubag sa publiko bahin sa mga alegasyon ubos sa giatras nga mga artikulo.
Apan, gidili gihapon ang dili awtorisadong pagpagawas sa mga ebidensiyang sakop sa confidentiality, protective orders ug ubang balaod.