Gisaway ni Liga ng mga Barangay President ug konsehal Julius Maghano ang Facebook post ni Konsehal Jason Chad Ayala nga may kalabotan sa alegasyon nga adunay pipila ka barangay captain nga nangayo og 10 porsyento gikan sa mga kontraktor. Atol sa iyang privilege speech sa sesyon sa Sangguniang Panlungsod sa Malaybalay City, gipadayag ni Maghano nga dili angay gamiton ang social media sa pagbatikos sa mga opisyal sa barangay tungod kay mahimo kining makadaot sa ilang reputasyon.
Matod ni Maghano, ubos sa Republic Act 6713, kinahanglan magpakita og propesyonalismo, integridad ug respeto ang mga opisyal sa gobyerno.
Sa paikas bahin gihangyo usab niini si Ayala nga molikay sa pagpangulo sa mga administratibong pagdungog nga may kalabotan sa mga kapitan tungod sa posibleng pagduhaduha sa iyang pagka-impartial isip chairman sa komite.
Sa laing bahin, giawhag ni Maghano ang mga adunay reklamo batok sa mga opisyal sa barangay nga mosang-at og pormal nga kaso ug magpresentar og ebidensiya pinaagi sa hustong legal nga proseso imbes nga idangop sa social media..