Mokabat sa kapin ₱2.3 milyon nga balor sa gitoohang shabu ug kontrabandong sigarilyo ang nasakmit sa mga operatiba sa Police Regional Office 10 (PRO-10) sa gipahigayon nga sunod-sunod nga operasyon sa Bukidnon, Lanao del Norte, ug Cagayan de Oro sa mga milabayng adlaw. Sa pakighinabi sa Bombo Radyo kang PMaj. Joann G. Navarro, tigpamaba sa PRO-10, gibutyag niini nga kabahin sa maong nasakmit ang ₱1.8 milyon nga balor sa shabu nga nakumpiska niadtong milabayng semana diha sa lungsod sa Kalilangan, Bukidnon ug sa Barangay Camaman-an, Dakbayan sa Cagayan de Oro.
Dugang pa ni Navarro, bago ra usab nga nasakmit sa mga sakop sa kapolisan ang kapin ₱500,000 nga balor sa mga smuggled cigarettes ug nadakpan ang usa ka suspek diha sa usa ka checkpoint sa lalawigan sa Lanao del Norte.
Gipatin-aw sa PRO-10 nga ang maong mga kalampusan kabahin sa gipahugtan nga anti-criminality campaign ubos sa pagpaningkamot ni Regional Director PBGen. Nestro Babagay Jr., diin nagpahamtang kini og “zero tolerance policy” batok sa mga ilegal nga kalihokan ug sa bisan kinsang miyembro sa kapolisan nga magsisilbing protektor niini.