Gi-angkon ni Presidente Ferdinand R. Marcos Jr. nga posibleng dili na maabot sa nasod ang target nga 8% economic growth sa tuig 2028 tungod sa padayon nga paghinay sa piso ug sa pagsaka sa presyo sa krudo.
Sumala sa Pangulo, kinahanglan na usbon sa gobyerno ang ilang mga economic projection kay misaka na ngadto sa ₱60 ang bili sa piso kontra dolyar niining mga miaging adlaw.
Giklaro usab sa Presidente, nga adunay limitasyon ang gahum sa gobyerno sa pagpahunong sa pagkunhod sa bili sa salapi sa Pilipinas.
Gipahayag ni Marcos nga dili praktikal ang pag-gamit sa foreign reserves sa nasod aron depensahan ang piso, gumikan ang lihok niini direkta nga diktado sa global o world market.
Gitumbok usab niini ang nagkagrabeng tensyon sa Middle East isip usa sa mga hinungdan sa pagsaka sa presyo sa lana.
Gumikan nagadepende ang Pilipinas sa imported oil, mosaka usab ang gasto sa pag-angkat sa mga produkto.
Busa, gilauman nga mosaka ang presyo sa mga batakang palaliton.
Ang mga ordinaryong Pilipino ang direktang makasinati sa epekto niini pinaagi sa mas mahal nga pamasahe ug presyo sa pagkaon sa umaabot nga mga bulan.