Magpasaka og kasong treason batok kang Former Supreme Court Senior Associate Justice Antonio Carpio si Senator Rodante Marcoleta tungod sa desisyon ni Carpio sa kaso nga Magallona vs. Ermita niadtong 2011 bahin sa teritoryo sa Pilipinas.
Sumala ni Marcoleta nga giuyonan ni Carpio ang argumento sa gobyerno nga kuhaan ang territorial sea sa Pilipinas aron adunay advantage sa Exclusive Economic Zone.
Dugang ni Marcoleta, nga ang mapa nga gisumite sa Arbitral Tribunal, wala nalakip ang Kalayaan Group of Islands sa Philippine territory, lakip na ang mga isla nga gipuy-an sa mga Pilipino sama sa Pag-asa, Parola, Kota, ug Panata.
Sa pikas bahin, mitubag si Carpio nga dili mahimo ang treason gawas sa panahon sa gubat, ug nga ang plano ni Magallona nga iapil ang tanan nga tubig ug isla sumala sa 1898 Treaty of Paris supak sa UNCLOS ug customary international law.
Dugang usab ni Carpio nga kung gisunod ang plano ni Magallona, madali ra untang ma-dismiss ang kaso sa Pilipinas sa Arbitral Tribunal ug mahimo’g pareho sa China nine-dash line, nga supak sa internasyonal nga balaod.
Sa pikas bahin, gibutyag ni kanhi Senator Francis Tolentino, nga author sa Philippine Maritime Zones Act (RA 12064), nagsulti nga dili na kinahanglan ang mapa, gumikan ang labing tukma mao ang mga coordinates nga gisunod sa RA 9522.