Subling mibarog si Senate President Vicente “Tito” Sotto nga kon moabot sa Senado ang managlahing impeachment complaint batok kang Presidente Ferdinand Marcos Jr. ug Bise Presidente Sara Duterte, kinahanglan molihok ang Senado subay sa saktong proseso ug sa gilatid sa Konstitusyon.
Dungan niini, gipadayag ni Sotto ang iyang katingala kon giunsa pagpirma ni Senator Ronald “Bato” Dela Rosa sa minority report nga gipagawas sa Senate Minority bloc ning bag-o lang, bisan pa man nga wala gihapon kini mopakita sa Senado.
Gibutyag ni Sotto nga hangtod karon, wala pa niya personal nga naka-istorya si Dela Rosa ug wala usab siyay kasayoran kon hain na kini karon. Kagahapong adlawa, nibalik na ang sesyon sa Senado apan wala gihapon motambong ang senador, kinsa kataposang nakit-an sa Senado niadtong Nobyembre pa sa miaging tuig.