Gidaghanon sa nakalas sa trahedya sa dagat sa Basilan, nisaka na ngadto sa 18

Misaka na ngadto sa 18 ang gidaghanon sa mga kumpirmadong namatay human nalunlod ang barkong MV Trisha Kerstin 3 sa kadagatan nga sakop sa Pilas Island, Basilan sa milabayng adlaw.

Ang maong barko, nga gipanag-iya sa Aleson Shipping Lines, gikan sa Zamboanga City ug naglawig padulong sa Jolo, Sulu sa dihang nahitabo ang trahedya sa tunga-tunga sa lawod.

Padayon pa karon ang gihimong search and rescue operations sa Philippine Coast Guard (PCG) ug uban pang mga awtoridad aron pangitaon ang uban pang mga pasahero nga gideklarang missing. Sa pagkakaron, gatusan na ka mga pasahero ang naluwas ug gidala sa Isabela City, Basilan aron mahatagan og dinaliang tabang medikal.