Rider patay human mawad-an og kontrol sa manubela sa may Maramag, Bukidnon

Nakabsan sa kinabuhi ang usa ka lalaki human kini maaksidente sa gimanehong motorsiklo sa South Poblacion, Maramag, niadtong Mayo 1, alas 4:20 sa kaadlawon.

Base sa imbestigasyon sa mga otoridad, nagmaneho ang biktima gikan sa North Poblacion padulong sa Purok 6 sa maong lungsod. Gituohang nagpadagan kini sa paspas nga tulin hinungdan nga nawad-an og kontrol sa manubela ug napakyas na sa pagpreno.

Tungod sa kakusog sa impak, nalabay ang biktima ug nakaangkon og grabeng samad sa ulo. Gidala pa kini sa rescue team ngadto sa balay-tambalanan apan gideklarang dead on arrival sa attending physician.

Sa pagkakaron, ang patay’ng lawas anaa na sa iyang pamilya samtang ang motorsiklo gikuha na usab sa iyang mga paryente.