Gikoronahan isip bag-ong Miss Universe Philippines 2026 ang pambato sa La Union nga si Bea Millan-Windorski atol sa mabulukong coronation night nga gipahigayon sa SM Mall of Asia Arena kagabii, Mayo 2.
Nalabwan ni Windorski ang uban pang 50 ka mga kandidata aron makuha ang prestihiyosong titulo. Gipasa kaniya ang korona sa iyang gisundan nga si Ahtisa Manalo. Tungod sa maong kadaugan, si Bea na ang opisyal nga representante sa Pilipinas alang sa ika-75 nga Miss Universe pageant nga ipahigayon sa Puerto Rico karong Nobyembre.
Nailhan ang bag-ong rayna sa iyang lig-on nga adbokasiya alang sa kalikupan ug sa katungod sa mga migrant workers. Sa wala pa misalmot sa Miss Universe Philippines, garbo usab niya ang titulong Miss Earth USA 2024 ug ang pagkahimong Miss Earth Water 2024.
Gawas kang Windorski, gilangkuban ang iyang court sa mga top candidates gikan sa Cebu, Cebu City, Pampanga, Sultan Kudarat, Taguig, ug Tarlac nga nagpakita usab og talagsaong gilas sa entablado.