Gisaway sa iladong international lawyer ug legal expert nga si Atty. Tony La Viña ang administrasyon ni Presidente Ferdinand “Bongbong” Marcos Jr. tungod sa giingong “hinay” nga pagtubag sa nagkagrabe nga krisis sa ekonomiya sa nasud.
Sa usa ka interbyu, gipahayag ni Atty. La Viña nga dili seryoso ang kagamhanan sa pagtabang sa mga Pilipino nga karon nag-atubang og kalisod.
Matud pa niini, daghan unta ang pamaagi aron mapagaan ang palas-anon sa katawhan apan wala kini gihimo sa kasamtangang administrasyon. Usa sa iyang gisuhestiyon mao ang pag-lift o pagtangtang sa mga buhis sa oil ug gas aron mapaus-os ang presyo sa mga palitunon ug krudo.
Gidugang sa abogado, kon dili mohimo og dinalian ug seryosong aksyon ang administrasyong Marcos, magpadayon ang pag-antos sa mga ordinaryong lungsoranon taliwala sa nagkataas nga presyo sa mga batakang panginahanglan.
Gipadangat usab sa eksperto, ang iyang katingala ug kabalaka sa kawalay aksyon matud pa sa administrasyon kalabot na sa panawagan nga tangtangon ang excise tax sa mga produkto sa lana.
Sumala niini, makapahibulong nga hangtud karon wala pay gihimong lakang ang kagamhanan aron suspendihon o tangtangon ang maong buhis, bisan pa man sa grabeng epekto sa krisis sa ekonomiya ngadto sa mga ordinaryong Pilipino uban sa dili katuohan nga dili makita o madawat sa administrasyon nga anaa sa tunga-tunga sa usa ka krisis ang nasud.