Mipadayag si Senate President Pro Tempore Panfilo “Ping” Lacson nga kinahanglang hatagan og kahigayonan sila si Senador Ronald “Bato” Dela Rosa ug Christopher Lawrence “Bong” Go nga magamit ang tanang legal remedies kalabot sa posibleng mga kasong atubangon sa International Criminal Court kon ICC.
Matud pa ni Lacson, nga ang mga lokal nga korte ug ang kasamtangang mga proseso sa Pilipinas kinahanglang respetuhon sa bisan unsang lakang nga mahimo sa ICC, nunot sa pagtudlo nila ni Go ug Dela Rosa nga gikaingong kauban sa mga co-perpetrators sa anti-drug campaign sa miaging administrasyon.
Matud niini nga kung ang ICC o bisan unsang langyaw nga korte mupagawas og warrant of arrest, kinahanglang moagi kini sa mga lokal nga korte nga maoy maghatag sa tukmang kamandoan sa dili pa kini mapatuman sa nasud.
Dugang pa sa Senador, nga tukion sa Senado ang posibleng mga lakang lakip na ang bisan unsang tabang nga mahatag sa duha ka Senador.
Mahimo usab nga magpatawag og caucus si Senate President Vicente “Tito” Sotto III aron konsultahon ang mga sakop sa Kamara.
Bisan pa niini, sigon usab ni Lacson, nga labing sayo pa nga mohatag og pinal nga posisyon tungod wala pay gipagawas nga bill of particulars ang ICC nga magdetalye sa eksaktong mga kaso ug posibleng silot ug tun-an pa kini sa mga abogado sa Senado sa dili pa modesisyon ang Kamara sa bisan unsang tukmang aksyon.