Duha ka sibilyan ang naangol human mibuto ang usa ka drone sa Russia nga mitugpa sa usa ka apartment building sa silangang dakbayan sa Galati, Romania, kagahapong adlawa, Mayo 29.
Subay sa report sa Romanian General Inspectorate for Emergency Situations, ang pagbuto sa explosive payload sa maong drone maoy hinungdan sa dakong sunog diin dinalian usab nga gipabakwit ang anaa sa 70 ka mga residente.
Giila kini sa Foreign Ministry sa Romania nga usa ka seryoso ug iresponsableng aksyon o escalation gikan sa Russian Federation, ilabi na nga kini ang labing unang higayon nga adunay mga sibilyan nga nasamdan sa ilang teritoryo sulod sa gubat sa Ukraine.
Tungod niini, nagpatawag dayon og emergency meeting si Romanian President Nicusor San sa Supreme Council of National Defense aron magpatuman og mga dinalian ug haom nga lakang.
Gideklara usab sa presidente nga ang Russia ang adunay bug-os nga tulubagon sa maong insidente nga nahitabo duol sa utlanan sa Ukraine. Sa wala pa ang pagbuto, nagpadala na ang Romania og duha ka F-16 fighter jets aron bantayan ang ilang airspace human namatikdan ang maong pagsulod.
Nanawagan na usab ang nasud, nga miyembro sa North Atlantic Treaty Organization (NATO), ngadto sa mga kaalyado niini alang sa dugang anti-drone capabilities.
Sa pagkakaron, wala pa’y giluwatan nga opisyal nga pamahayag ang Moscow kalabot sa maong hitabo nga hugot nga gikondena sa NATO ug mga lider sa Europa.